Pagadian City – Nakigkutay na karon ang kapulisan ngadto sa pamilya sa tricycle driver nga ulahing biktima sa pagpamusil ning syudad aron masuta ang motibo niini.
Mahinumduman nga alas 11:55 sa gabii niadtong sabado patay ang biktima nga si Marlon Bacalso human kining gipusil sa wala mailang mga suspek dihang dapita Purok Madanihon, Barangay Bulatok, Pagadian City partikyular sa exit nga bahin sa Integrated Bus Terminal.
Nasayran sa RMN DXPR Pagadian nga ang biktima nga residente sa Purok Rizal, Barangay Sto. Niño nagpahiluna lang sa iyang gimaneho nga tricycle apan kalit nga niabot ang mga suspek sakay sa color pula nga XRM og walay langan nga nipusil sa biktima gamit ang calibre 45 nga pistola base sa lima ka basiyo sa bala nga nahipos sa dapit nahitabuan.
Base sa imbestigasyon dali nga nisibat ang mga mamumuno sa Rotonda, Barangay Dao human ang krimen.
Naglusad na og makuti nga pagtoon ang kapulisan aron sa possible nga pag-ila ug pagsikop sa mga suspetsado.
