Truck ngan P2-Million nga kantidad han P&G products, ginkawat han mga armado nga suspek

3044

TACLOBAN CITY – Ginkawat han mga armado nga suspek an 10-wheeler truck nga mayada sulod hin mga produkto han Procter and Gamble nga nagkakantidad hin P2-Million ha Maharlika Highway Brgy. Jia-An, Jiabong, Samar dida han Sabado, June 22.

Subay ha report han Police Regional Office 8, ginbabaybay han truck an nasabi nga dalan nga ginmamaneho ni Christian Jed Villacarlos, 34 anyos, residente han san catalina Atimonan, Quezon; ngan an upod hini nga hi John John Delos Reyes, 24 anyos, may asawa ngan residente han Southville 5A, Langkiwa Binan, Laguna.


Sakay an mga suspek han Isuzu Pick-Up D-Max nga waray plate number, tigda ini nagpaharurot pagpadalagan ngan gin-alihan an truck. Humaw-as an mga suspek dara an mga armas ngan ginpagawas naman ha truck an mga biktima.

Sumakay an pira nga suspek ha truck samtang an iba nga suspek in sumakay han ira isuzu pick up, ginbayaan an mga biktima ha kakalsadahan.

Tikadto unta ha Ormoc an mga biktima para igdul-ong an mga produkto.

Ha pagka-yana nagpapadayon an imbistigasyon han mga otoridad para ma-identify an mga suspek.

Facebook Comments

From Advertisers