Nakauli na sa ilang tagsa-tagsa ka pamilya ang tulo ka mga menor de edad nga gikareport nga missing sa milabayng semana.
Sa Bahay Pag-asa sa Iligan City na nakuha sa mga ginikanan ang ilang 13 anyos nga dalagita human wala makauli sa ilang balay niadto pang Oktubre 15 ning tuiga.
Sa interview sa dxCC-RMN gibutyag sa inahan nga si Juliet Peconada, taga Manticao, Misamis Oriental nga niadtong Biyernes girescue sa kapulisan sa Iligan City ang iyang ika-siyam nga anak nga si Agot human naglatagaw mga alas 10 sa gabie atol sa curfew hour.
Natultulan usab sa laing ginikanan ang usa pa ka 14 anyos nga dalagita nga kuyog ni Agot sa Iligan City nga si Angelica Roxas.
Mahinumduman nga niadtong Oktubre 17, Miyerkules, nagpakitabang sa kapulisan sa Naawan ug Manticao, Misamis Oriental ang mga ginikinan aron makita ang duha ka mga menor de edad.
Samtang human ang duha ka semana nakita ra usab sa ginikanan ang menor de edad nga si Leah Bandiola Cabilogan sa Barangay 24, Gingoog City.
Sa interview sa dxCC-RMN gibutyag ni PO1 James Salva sa Magsaysay Municipal Police Station nga niadtong Oktubre 19, Biyernes nakuha sa ginikanan si Cabilogan ug nasayran nga nikuyog kini sa iyang barkada niadto pang Oktubre 5.
Ang tulo mihawa sa ilang balay nga walay pagpananghid o pagpahibalo sa mga ginikanan ug nikuyog sa ilang mga barkada.
