Patay ang tulo ka mga tawo human nga nagpabuto batok sa kapulisan samtang gisilbi niini ang warrant of arrest batok sa leader sa Fajardo Criminal Group.
Gibutyag ni COCPO spokesperson Police Major Ivan Vinias, nga basi sa iyang nadawat nga report nga bandang alas-6:45 ang takna kagabi dihang gipahigayon ang OPLAN PAGTUGIS, OPLAN SALIKOP ug OPLAN OMEGA sa Criminal Investigation and Detection Group 10, inubanan sa Laguna Provincial Police Office, Lumbia Police station, 12TH SAC SAF, 103rd SAC SAF, Joint Task Force Hunter, 4th ID, Regional Intelligence Unit 10 ug Regional Intelligence Division 10, batok sa target nga nailang si Marvin Fajardo.
Si Fajardo minyo ug residente sa Brgy. Suplang, Tanauan City, Batangas ug kasamtangang nagpuyo sa Portico II Grand Europa Brgy. Lumbia ning dakbayan.
Matud pa nga dala sa mga otoridad ang warrant of arrest batok kang Marvin Fajardo tungod sa kasong Direct Assault nga giisyu sa 4th Judicial Region MTCC Tanauan City, Batangas niadtong December 1, 2013 ug adunay girekomendang pyansa nga 12-mil pesos.
Apan kalit matud pang nagpabuto si Marvin kauban ang duha pa ka lalake, hinungdang mibalos ang kapulisan nga miresulta sa panag- engkwentro.
Tungod niini, daling nadala sa JR Borja General Hospital ang mga suspek kinsa parehong nakabsan sa kinabuhi.
Nasayran nga si Marvin Fajardo ang leader sa FAJARDO CRIMINAL GROUP, nga nalambigit sa gun for hire, illegal drugs ug robbery extortion nga nag-operate sa Batangas City, Laguna ug National Capital Region.
Giila usab kini nga High Value Target sa Police Regional Office 4A ug nag-atubang sa high profile cases apan puro na-dismiss.
