Roxas City, Capiz – Pagalauman ang madasig nga pagsangkad sang turismo sa Olotayan Island, matapos nga mapasiga na ang nasambit nga isla sang nagligad nga adlaw sang Sabado, July 7, 2018. Ini ang posible nga mangin bunga sang madugay na nga handum sang mga residente nga ma-energize ang isla nga nahatagan na sang katumanan.
Sa mensahe ni Capiz Governor Antonio del Rosario nga isa sa mga dinapit nga bisita sa ginpatigayon nga energization ceremony, nga maga-umwad ang pagpangabuhi sang mga residente sa Brgy. Olotayan, magabukas ang madamo nga trabaho kag magasangkad ang turismo bangud sang pagtindog sang mga restaurants, resorts kag hotels sa nasambit nga isla.
Nahibaluan nga sa bulig sang CAPELCO kag mga opisyal sang probinsya natigayon nga makapahamtang sang submarine cable nga amo ang magadala sang supply sang kuryente nasambit nga lugar. Ginpasalamatan sang mga residente ang anay tiglikom sang DILG nga si Mar Roxas sa iya inisyatibo nga mapadasig ang pagpagwa sang pondo nagikan sa national government nga ginapamunuan anay ni Presidente Pnoy.
Sa madumduman nga kapin sa 60 milyones pesos ang ginpain nga pondo sang gobyerno agud mapasiga ang Isla sang Olotayan pinaagi sa Sitio Electrification Program kag Barangay Line Enhancement Program.
