Gikan sa derby sa Matina, Davao City ang pinaka-unang kaso sa COVID-19 sa probinsya sa Bukidnon.
Sa interview sa RMN Malaybalay ngadto kang Valencia City Vice Mayor Doc Pol Murillo, gibutyag niini nga niadtong buntag sa Abril 9 ning tuiga nakadawat sila ug kumpirmasyon gikan sa DOH nga adunay nagpositibo sa COVID-19 nga usa ka barangay opisyal sa Barangay Lumbayao sa mao nga siyudad.
Nasayran nga naka-adto kini nga pasyente sa derby sa New Matina Davao Gallera, kung diin nag-gikan ang pipila ka tawo nga nagpositibo sa maong sakit, kaniadtong Marso 12, 2020.
Samtang sa interview sa RMN Malaybalay, gipasalamatan ni Brgy. Lumbayao Kapitan Nelson Cabaluna ang LGU Valencia City sa gihimong hugot nga pagmonitor sa iyang kahimtang human nga nagpositibo siya sa COVID-19.
Matud ni Kapitan Cabaluna nga medyo nakulbaan siya human iyang nahibaw-an nga nagpositibo diay siya sa mao nga sakit.
Si Cabaluna ang pinaka-unang biktima sa coronavirus sa Bukidnon.
Nagtoo siya sa derby sa Matina niya nakuha ang mao nga sakit.
Sa karon naka quarantine na ang mga tawo nga iyang nasalamuha.
