Sugdan nang ipanghatag sa bulan sa Hulyo ang subsidiya sa gobyerno ubos sa Tax Reform for Acceleration and Inclusion o TRAIN Law.
Sa gihimong roundtable discussion, nahisgutan sa mga ahensyang motubag sa social protection nga ihatag na ang 2,400 pesos nga unconditional cash transfer o U-C-T ug fuel vouchers ubos sa Pantawid Pasada Program hangtud sa katapusan sa Hulyo.
Mokabat sa 8 milyon ka pamilya ang makapahimulos sa unconditional cash transfer gikan sa Department of Social Welfare and Development o D-S-W-D.
Samtang, naa sa 977 Million pesos usab ang gigahin sa D-O-T-R nga budget para sa Pantawid Pasada Program kung asa ang government subsidy, i-load sa debit card nga ipanghatag sa Land Transportation Franchising and Regulatory Board o L-T-F-R-B sa mga benepisyaryo.
Gawas sa U-C-T ug fuel vouchers, giplano na usab ang pagpanghatag sa social benefits card kung asa hatagan sa diskwento sa palitong bugas, pamasahe ug hatagan usab sa free skills training ang mga unemployed, minimum wage earners ug 50% sa poorest population.
Tumong sa social protection program nga makatabang ug makaginhawa ang publiko sa epekto sa nagtaas nga presyo sa palaliton ug serbisyo tungod sa TRAIN.
