Ilusad sa mga nagkadaiyang parallel support groups ni presidente Rodrigo Duterte ang “Unity for Federalism” nga kalihukan, karong adlaw nga Sabado sa University of Southern Philippines Foundation (USPF), brgy. Lahug dakbayan sa Sugbo.
Ang maong kalihukan panguluhan kini sa Duterte Clan Cebu, nga sugdan sa alas-8 sa buntag hangtod sa alas-8 sa gabie ug gilauman nga tambongan kini mismo ni presidente Duterte.
Suma ni Rey Duterte Abad, sa Duterte Clan Cebu, nga 97% na nga kumpirmadong motambong ang presidente sa maong kalihukan, diin gikatakda kining moabot sa Sabado sa hapon.
Gawas niini, pipila ka mga inilang personalidad usab ang motambong sa kalihukan, sama sa sikat nga mag-aawit nga si Dulce Amor, PAGCOR AVP for Community Relations and Service Department Arnel Ignacio, Tourism Usec. Kat de Castro, undersecretaries, cabinet members, ug Presidential Assistant for the Visayas Michael Dino.
Samtang gikontra ni Atty. Enrique Rama sa People’s Initiative for Federalism, ang mga gipamahayag ni kanhi Chief Justice Hilario Davide Jr. batok sa federalism.
Kahinumduman nga una nang gisupak ni Davide, ang pag-usab sa sistema sa panggobyerno dinhi sa nasud, diin iyang gihulagway ang federalism nga anti-poor.
Gawas niini, alang kang Davide risgo usab kini hilabi na nga dili pamilyar ang mga Pilipino sa maong matang sa panggobyerno, mabahin-bahin usab ang mga pinoy niini ug mo-resulta kini sa double taxation alang sa State tax ug Federal tax.
Si Rama supak sa gipamahayag ni Davide nga anti-poor ang federalism, tungod kay pinaagi niini, ang dako nga pahat sa income ug buhis sa usa ka probinsya, ipabilin man kini sa mao nga lugar ug 30% ra niini ang ihatag ngadto sa national government.
Dugang ni Rama, dili sab maayo nga ipabilin ang bulok nga sistema sa nasud ug angay na kining usbon.
Gilauman nga moabot sa 50,000 ngadto sa 100,000 ka mga tawo ang motambong sa maong kalihukan.
Facebook Comments
