Pagadian City – Nisaka na sa siyam ang gikatahong nakabsan samtang kritikal usab ang driver ug kapin 30 ka tawo ang kasamtangan nga gi-atiman sa mga doktor human nawad-an og preno ang pampasaheroang jeep nga gisakyan sa mga miyembro sa Pantawid Pamilyang Pilipino Program o 4Ps diin didto kini naligid sa Purok Bahada, Barangay Dao, Pagadian City alas 11:15 sa buntag.
Sa interview sa RMN Pagadian kang Cogonan Brgy. Captain Cerning Bicagas, gikan ang iyang mga konstitwente nga pulos 4Ps beneficiaries sa Sitio Glab Barangay Cogonan, Labangan sa probinsya sa Zamboanga del Sur paingon kini syudad sa Pagadian City aron mag-withdraw unta karong adlawa ilang monthly cash assistance.
Nasayran nga nawad-an og preno ang jeep sa bahada nga bahin sa kalsada rason nga nibangga sa ubang sakyanan hangtud nga miligid sa makatulo nga higayon ngadto sa kilid kalsada.
Gidapatan sa og tambal sa mga doctor ang mga samaran nga giadala sa Zamboanga del Sur Medical Center ug sa duha ka pribadong ospital.
Giila ang namatay nga sila Ernesto Guinican 48 anyos, Julieto Guinican 50 anyos, Tato Guinican 15 anyos, Florencio Pecay Jr. 38 anyos, Lindan Bawan 65 anyos, Mary Joy Guilingan 42 anyos, Julieta Guinican 29 anyos , Angelo Macatulad 13 anyos ug ang ulahing gikatahong nakabsan mao si Junior Casang.
Sa nakuhang CCTV Footage sa RMN makita nga overloaded ang maong sakyan nga gimaneho ni Marlito Palaran.
Sa interview sa RMN sa naluwas nga si Joel Arnejo nisingit matud pa ang driver og tabang kay nibuto na ang preno rason nga gumikan sa kahadlok nangambak ang pipila ka sakay ilabina ang anaa sa ibabaw nga bahin sa Public Utility Vehicle.
