Ginbawian sang kabuhi ang duha ka mga biktima sa pagkarambula sang 10-wheeler truck , awto, kag mortorsiklo sa bahin sang Brgy. Balabago, Jaro, Iloilo City alas 10:50 kagab-i.
Base sa imbestigasyon, nagahana nga magliko sa ila courtyard ang 10-wheeler truck nga ginapanag-iyahan sang Moreta Shipping Lines kag ginamanehar ni Napoleon Alim Jr., 46 anyos kag residente sang Calubihan, Jaro, apang wala ini natalupangdan ni Richard Medrocillo, 19 anyos sang Inangayan, Sta.Barbara nga amo ang nagamanehar sang Honda TMX MC nga may plate no. NA 55456 nga nagbunggo ini sa buli sang truck.
Nagbunggo man ang Hyundai Eon hatchback nga may plate no. FHR 913 nga nagasunod sa motorsiklo nga ginamanehar ni Alfie Angelo Desamparado, 22 anyos sang Jalandoni Estate, Lapuz, Iloilo City.
Gindeklara nga dead on arrival ang driver sang motorsiklo nga si Richard Medrocillo alas 1:10 kaina sang kaagahon tuga sang patal nga pilas sa ulo.
Samtang gindeklara man nga dead on arrival si Benmar Evacuado, 24 anyos sang Baldoza , Lapaz nga yara sa passenger’s seat sang awto alas 11:45 kagab-i tuga sang patal nga pilas sa ulo kag pilas sa nagkalain-lain nga bahin sang iya lawas.
Nakaagum naman sang kapilasan sa nagkalain-lain nga parte sang lawas kag pagpalanakit sang liog kag wala nga tiil ang driver sang awto nga si Alfie Angelo Desamparado.
Samtang ang driver sang 10-wheeler truck ang nakahunong na karon sa Jaro PNP.
