Nasikop sa mga otoridad ang usa sa mga leaders sa squatter og yuta sa Cagayan de Oro City. Kini atol na sa gipahigayon nga police oplan pagtugis sa mga personahe gikan sa Regional Special Operations Unit kon RSOU 10 nga gipangulohan ni PLt. Neil Payos ubos sa supervision ni PLt.Col. Angelo Bringas Nicolas alayon na sa Tagoloan Municipal Police Station ug sa Unified Task Force Konkrim.
Naila ang suspetsado nga 79 anyos nga si Emmanuel Saraos alyas Manuel Saraos y Cabigon, minyo nga residenti sa Purok 6, Villa Rosario, Brgy. Caasinglot sa Tagoloan, Misamis Oriental.
Nasikop ang maong suspek pinasikad sa warrant of arrest nga gipagula og pinirmahan ni Hon. Evelyn Gamotin-Nery, ang acting Presiding Judge sa RTC Branch 20 sa Cagayan de Oro City nga pinetsahan niadtong Mayo 20 sa nakalabay’ng tuig tungod sa kasong Indirect Contempt.
Nasayran nga si Saraos ang usa sa mga nangulo sa pagpang squat og yuta ug nag-ingganyo ngadto sa mga tawo nga tukoran sa panimalay ug puy-an ang luna nga nahimutang diha sa Purok 11, Baloy sa Brgy. Tablon ning syudad sa Cagayan de Oro.
Ang maong luna gipanag-iyahan kini ni Angela Neri-Guirnela Mcneill nga duna nay mga squatter nanimuyo karon sa maong lugar.
Matud pa ni April Dablio, ang representante sa pamilyang Neri-Guirnela nga duna nay court order gikan sa Korte Suprema nga ipapahawa na ang mga nanimuyo sa maong lugar. Apan gibalewala kini ni Saraos ug sa lain pang mga kaubanan ni-ining leader nga squatter og yuta sanglit nang-ingganyo na man nuon sila og mga tawo nga mopuyo sa nasangpit nga luna.
Tungod ni-ini, si Saraos karon ang unang na-aresto sa mga otoridad kalabot na sa kasong Indirect Contempt kon pagbalewala sa order gikan sa Korte. Nahibaloan nga si Saraos ang daghan pang mga kaso gikan sa nagkalain-laing branches sa korte og napamatud-an kon found guilty sa kasong Malicious Mischief.
Samtang ang lugar kung asa nagpuyo ug nasapon ang maong suspetsado, nahibaloan nga squatter’s area gihapon.
Ang maong suspek karon ang ana-a na sa kostudiya sa kapulisan alang sa proper disposition and documentation.
Pahimangno sa pamilyang Neri-Guirnela karon sa mga namuyo sa Purok 11A, Baloy, Tablon ning syudad nga maghinay-hinay na og pangita sa laing kabalhinan ug dili na magpatonto pa sa mga walay ayong lider nga mga squatter og yuta.
Kasama mo sa RSOU-10, RadyoMaN Andy Coco, DXCC Tatak RMN!
