Davao City – Giklaro ni Davao City Mayor Sara Duterte-Carpio nga dili pa required sa syudad sa Davao ang pagpakita og vaccination record sa pagsulod sa mga opisina ug establisyemento.
Matud sa alkalde (sa interbyu sa city-owned radio) dili pa tanan rehistrado sa COVID-19 VaxCertPH nga mao dapat ang basehan sa pag-verify kung vaccinated na ang usa ka indibidwal, ug padayon pa usab karon nga ginaproseso ang database sa SafeDavao QR (DQR) dinhi sa dakbayan.
Giklaro ni Mayor Sara nga dili usab angay gamiton ang vaccination card tungod kay dali lamang kining mapeke sama sa mga insidente kaniadto sa pagpresenta og peke nga dokumento isip rekisitos sa COVID-19 protocols.
“Kung makit-an ninyo sa Alert Level 3, naa silay provision dihaa nga vaccinated na tawo to eat in restaurant, mas dako ang imuhang operational capacity. What we will do is what is favorable sa businesses, we will adopt that. So you can increase your operational capacity but there is no need to require people to present their vaccination record, sa pagkakaron,” tataw sa mayor.
Gitataw ni Duterte-Carpio nga kung aduna may establisyemento nga magpatuman og ‘No Vaccine, No Entry’ Policy, ilaha na kining kaugalingon desisyon, apan kini wala girekomenda sa alkalde.
RadyoMaN Kirby Manzon
