Vice commander ug duha ka team leader sa NPA mi-surrender

Davao City – Walay hunong ang pagtahan sa mga sakop sa teroristang CPP-NPA-NDF sa poder sa kasundalohan ug sa sabakan sa gobyerno.

Ulahing misurender mao ang tag-as nga mga opisyales sa maong pundok nga gilangkuban sa usa ka vice commander, duha ka team leader ug usa ka demolition specialist sa NPA ngadto sa 66th Infantry Battalion Philippine Army nga nakabase sa ComVal Province.

Unang mitahan sa 66th IB mao si Alias Cory, 25 anyos, Vice Commander sa Platun Basil sa Pulang Bagani Command 8 niadtong Enero 3 ning kasamtangang tuig.


Si Kumander Cory mao sa’y nahimong instrumento aron makasurender nila alyas JB nga usa ka demolition specialist, alyas Basil, 17 anyos ug alyas Jeffrey kinsa pulos team leader sa Primera sa PBC 8 sa teroristang CPP-NPA-NDF.

Apil sab gisurender sa upat ang ilang mga armas, duha ka IED, sais mil ka pesos alang sa ilang supply, mga tambal, mga subersibo, ug mga personal nga kagamitan.

Nakahukom ang upat nga manurender gumikan sa kapait nga ilang sa pakigbisog sama sa kagutom, kakapoy sa pagdagan-dagan ug kamingaw sa ilang mga pamilya samtang ang ilang mga labaw haruhay kaayo og kahimtang sa patag.

Matud ni 66TH IB Commander Lt.Col.Palmer Parungao nga ang pagtahan sa upat nagpa-matuod lang nga dili tinuod ang gipasiatab sa tag-as nga mga opisyales sa kumunista nga patyon sila sa militar kung mutahan.

Gikalipay ni Parungao ang pagsurender sa upat tag-as nga mga opisyales sa NPA ug samtang gipasalamatan usab niini ang iyang mga ginsakpan tungod sa maong laing kadaugan sa kampanya kontra insurhensiya.

RadyoMaN Joel Viray

Facebook Comments