BACOLOD CITY – (2nd Update) Nalampusan sang botelya ang tangkugo sang isa ka waiter kag natapungulan pa bangud gid lamang sa suyaay kayman naagawan sang customer ang isa ka macho dancer sini lang nga kaagahon sa isa ka gay bar nga nahamtang sa San Sebastian-Araneta diri sa ciudad sang Bacolod.
Nagpadulong sa Police Station 1 ang biktima nga si Chuck Marchi Sanchez, 25 anyos ang edad, pumuluyo sang Brgy. 29, Bacolod City kag waiter sang One Place Entertainment and Resto Bar agud ipa-blotter si Lucas Moreno, 31 anyos ang edad, tumandok sang Brgy. Matina, Davao City kag isa naman ka macho dancer sa amo nga bar.
Suno kay Chuck, mga las 4 kaina sang kaagahon, may nagsulod nga duha ka babayi nga customer sa ila bar.
Apang, imbes nga serbisyo sang macho dancer ang ila kuhaon, gin special request sini nga mga babayi nga ang waiter nga si Chuck amo ang mag-entertain sa ila.
Suno kay Chuck ginpasaot siya sang amo nga mga customer kag ginbayaran sang P1,000 pesos.
Ini ang ginalantaw nga rason posible kon nga-a nasuya si Lucas gani sang nagpanaug na ang waiter, iya ini ginsukmaan tubtub nga naglalisay sila, nagsumbaganay kag nalampusan pa sang botilya sa ulo si Chuck. /dyHB BACOLOD
