CADIZ CITY, NEGROS OCCIDENTAL – Gin-turn over na sang Cadiz PNP sa National Bureau of Investigation ang cellphone sang napatay nga ma-estro nga si Eric Geronga.
Madumduman nga sadtung Enero 21, nasapwan nga bangkay si Geronga sa higad sang kampo, malapit naman sa subdivision nga ila gina-istaran.
Una diri nag-gwa ang anggulo nga nag-suicide ang ma-estro bangud nga may nakit-an nga armas sa iya tupad, apang sa gipatigayon nga paraffin test, nag-negatibo sa gun powder ang biktima.
Antis pa man ang resulta sang paraffin test, naga-duda na nga da-an ang pamilya ni Geronga nga nag-hikog si Eric sa diin hugot ang ila pagpati nga may foul play ang iya kamatayon.
Ang update sang sini nga kaso, amo nga gin-tugyan na sang Cadiz PNP ang Samsung J7 nga cellphone ni Sir Eric para sa dugang nga imbestigasyon.
Suno kay NBI-Bacolod Incharge Renoir Baldovino, parallel investigation ang ila himuon sa diin ila usisa-on ang conversation ukon mga mensahe sa cellphone nga maka-hatag naman sang kasanagan sa kamatayon sang ma-estro.
Sa karon may ginalantaw na nga iban nga anggulo ang NBI sa kamatayon ni Geronga ilabi na nga may ginahatag nga importante nga impormasyon ang asawa mismo sang biktima./dyHB BACOLOD
