Gidayig ni Doctora Josephine “Penny” Bundoc, program director sa international charity organization nga Physicians for Peace-Philippines, ang nindot nilang partnership sa Provincial Government sa Sarangani gipangunahan ni Governor Steve Chiongbian Solon, bise-gobernador pa kaniadto, nagsugod tuig 2008, dul-an onse (11) katuig na ang nakalabay, hinungdan nga daghan na matud pa silang natabangan nga mga PWDs kon persons with disability dili ra sa Sarangani Province kundili sa tibuok Rehiyon Dose.
Bag-uhay lang, nakahilak ang usa ka inahan taga-Malandag, Malungon samtang gisaysay ang kinabuhi sa iyang anak nagpangidaron og singko (5) anyos human nga gipakatao kining putol ang tuong tiil. Makabaton na unya ang iyang anak og usa ka prosthesis kon artificial nga tiil.
Si Thelma, baynte-syete (27) ang edad nga taga-Gensan, ang natagaan nag walker maayudahan ang pagka-balda sa iyang lawas human nga nahulog kini sa lima (5) ka andana nga building didto sa nasud Kuwait. Samtang si Ginang Pebe ang hilabihan ang pagpasalamat tungod kay ang iyang duha (2) ka pasyente nga taga-Banga, South Cotabato naigo sa balatian nga polyo may pangidaron nga kwarenta (40) anyos og dose (12) anyos, ang libre nang makagamit sa ipanghatag nga mga wheelchair.
Dako usab ang pagpasalamat sa baynte-dos (22) anyos nga si Steven taga-SACI Compound sa Alabel tungod kay gawas sa braille nga nahatag kaniya ni Governor Solon kadtong nagtungha pa siya sa elementarya nagamit aron paspas sya nakatuon sa pagbasa taliwala nga may diperensya ang iyang panglantaw, nadawat na pud niya ang cane, usa ka walking stick o tungkod nakatabang sa iyang paglakaw.
