5:35 AM 02NOV2019
Gipahibalo sa City Disaster Risk Reduction and Management Department o CDRRMD nga basi sa Weather Forecast sa PAGASA ganihang 4:00 sa buntag, walay bagyo apan adunay DUHA ka Low Pressure Area (LPA) sulod sa Intertropical Convergence Zone (ITCZ) nga anaa sulod sa Philippine Area of Responsibility (PAR).
Ang gibantayang LPA anaa sa gilay-ong 135 km Sidlakan (East) nga bahin sa Surigao City, Surigao del Norte samtang ang laing LPA adunay gilay-ong 185 km Kasadpan (West) nga bahin sa Dipolog City, Zamboanga Del Norte ganihang 3:00 sa buntag. Ang duha ka LPA GAMAY ang tsansa nga mamahimong bagyo.
Ang Northern Mindanao apektado sa duha ka LPA; ug ITCZ ug tungod niini maka-sinati sa mapanganuron nga kalangitan inubanan sa katag-katag nga pag ulan, kilat ug pagpanalugdog. Ang Amihan (Northeast Monsoon) dili direktang maka-apekto sa tibuok Mindanao.
Ang ITCZ mao ang pagtabo sa hangin gikan sa Northern ug Southern Hemispheres duol sa equator. Kini nga pagtabo mo-resulta sa mga baga nga panganod nga gadala ug pag ulan.
Hinay (light) ngadto sa kasarangan (moderate) nga hangin nga magagikan sa Amihanang-kasadpan (Northwest) ngadto sa Habagatang-kasadpan (Southwest) maoy mo-resulta sa 0.6 – 2.1 meters nga balud sa kadagatan sa tibuok Mindanao.
Mapanganuron ang ubang parti sa Cagayan de Oro karong orasa.
Mapanganuron sa Libona; Mampayag, Dahilayan ug Lindaban, Manolo Fortich. (Kining mga lugara mao ang tinubdan sa tubig nga makapabaha sa Lapasan paingon sa Bugo)
Mapanganuron usab sa Talakag ug Baungon karong orasa. (Kining mga lugara ang makapasaka sa tubig sa suba sa Cagayan)
NORMAL ang LEVEL sa tubig sa mga suba sa Cagayan ug Iponan.
Samtang, CDRRMD pabilin sa pag monitor.
