Usa ka gold ug duha ka bronze medals ang nakuha sa mga boksidor sa Cagayan de Oro City sa bag-ohay lang natapos nga 1st Thailand Open International Boxing 2018.
Tungod niini, gipahalipayan ni Mayor Oscar Moreno ang tulo ka kagay-anong boksidor atol sa flagraising sa city hall kaganihang buntag.
Kini mao ang gold medalist nga si light flyweight Carlo Paalam, bronze medalists nga silang flyweight Marvin Tabamo ug light welterweight Sugar Rey Ocaña.
Lakip usab sa gipahalipayan ang ilang head coach nga si Elmer Pamisa.
Matud ni Mayor Moreno nga ang kadaugan sa tulo ka kagay-anong boksidor usa ka dakong garbo ug dungog sa syudad ug nasud.
Gidugang sa mayor nga magsilbi usab kining inspirasyon sa ubang mga boksidor sa Cagayan de Oro nga gustong molampos sa natad sa boksing.
Nasayran nga ang tulo ka mga boksidor pulos mga produkto sa grassroots amateur boxing development program ni Mayor Moreno ug miyembro na karon sa Philippine national boxing team.
Source: CIO
