Kalibo, Aklan — Nakaangkon it tama it pagbuno sa tuo nga dughan ro sangka 19-anyos nga eaeaki matapos nga mabun-an ko nagtaliwan nga gabii sa sangka namatyan sa Purok 3-A Tinigao, Kalibo, Aklan.
Ro biktima nakilaea kay Brandon Zonio . Samtang rong suspek nakilaea man kay Edison Resco, 34-anyos tanan residente it nasambit nga lugar.
Sa panaysayon ni Jayson Rome sa Kalibo PNP amigo it biktima nga imaw ra rong saksi sa natabo nga nagkita rong suspek ag biktima sa sangka namatyan, nagtueokan ag may nagpatunga nga mainitang diskusyon kanda ag natabo rong pagpamuno.
Insigida nga ginpatigayon rong hot pursuit operation kuntra sa suspek ag dayon man nga nadakpan.
Detained makaron sa lock up cell it Kalibo PNP ag magapangatubang it naga kaigo nga kaso.
