Ginabulubanta nagdangat sa kapin 28 million pesos nga balor sang Giant Clam ukon “Taklobo“ ang natigayon nga ma-recover sa isa ka balay matapos boluntaryo ini nga ginturn-over sa lokal nga mga utoridad sa Had. Juliana, Brgy. Washington, Escalante City sadtong Agosto 2, las 5 sang hapon.
Suno sa Escalante City Police Station sa pagpamuno ni Police Lt. Col. Necerasto Sabando Jr., nga ini sila upod ang BFAR kag Executive Assistant sang Escalante City, Rolen Cabus ang nagpatigayon sang inspection sa ginreport nga abandoned nga mga True Giant Clam ukon Taklobo sa amo nga lugar.
Ang amo nga mga endangered species sang sea shells ang nakita sa balay ni Jasper Bacaron nga amo naman ang boluntaryo nga nagturn over sini sa utoridad.
Ginpahayag sang pulis nga durante ginapatigayon ang recovery, nagtuad si Bacaron sa executive assistant nga ang tag-iya ukon buyaer sang mga giant clams amo si Nexon Aurelio, legal ang edad kag pumuluyo sang Brgy. Vito, Sagay City.
Kapin sa 7 tons sang fossilized nga giant clams ang na recover kay may total market value nga 28 million pesos.
Sa karon ini ang gindala na sa BFAR 6 Provincial Fishery Office sang Negros Occidental sa BacolodCity para sa custody kag safekeeping.
