Gidungog sa Sangguniang Panlungsod sa dakbayan sa Butuan ang hangyu sa mga negosyante bisan sa City Legal Office nga tagaan ug ‘leeway’ ang mga establismento nga nagkulang sa occupancy permit aron makapadayon gihapon sa ilang patigayon.
Gumikan niini, gipahigayon ang Committee Hearing sa Committee on Ways and Means sa Konseho aron matuki ang nasangpit nga hisgutanan.
Gipasabot ni City Councilor Atty. John Gil Unay, nga pinasikad sa balaod mahimung sirad-an sa local nga kagamhanan ang usa ka establismento kung pakyas kini sa pagkuha ug occupancy permit apan daw naalarma ang LGU Butuan sa dihang kapin 30 ka mga establismento na sa Butuan ang gipasirad-an nga nakaapekto sa dagan sa negosyo ning syudad.
Gitumbok ni Konsehal Unay nga kapakyasan kini sa nakalabyang administrasyon sanglit gipasagdan lamang ang mga nahisgutang kakulangon.
Gilaraw sa Sangguniang Panlungsod nga tagaan ug 1 ka tuig nga ‘leeway’ ang halos 60% nga patigayon dinhi sa Butuan aron makumpleto ang occupancy permit sanglit nakita nga silang tanan pulos nga mga violators.
Dili mahimung pasagdan sa LGU Butuan ang pag-isyu ug cease and desist order batok sa mga patigayon sanglit nasuta nga mawad-an ug P100 milyon pesos nga income ang syudad sa Butuan.
Nanghinaot ang opisyal nga paigu na ang ihatag nga 1 ka tuig aron makumpleto ang tanang rekisitos sa mga magpapatigayon ning dakbayan (with report sasie babar/bebs tuso). [image: amnesty res.jpg]
