Kalibo, Aklan – “Palangga ta kamo, indi eon ako kinyo magpakalisod”.
Raya rong naka sueat sa suicide note it sangka 47-anyos nga eaeaki matapos nga nakitang nakabigti ag uwa eon it kabuhi kaina sa andang baeay sa Brgy. Briones, Kalibo, Aklan.
Sa pagpangusisa it News Team sa lugar nga halin sa hospital ro anang tiyo ag pag-abot sa baeay ay gintawag ro biktima ugaling uwa nagsabat, ginkatok pa gid nana ag gintan-aw ag nakita na rayon rong biktima nga matsa nagatindog.
Ana pa gid nga gin usisa ag dikato nakita nga nakabitay ta rong biktima ag maeamig eon rong eawas ag patay eon.
Nakibot eamang ro anang tiyo ag tiya sa hitabo ngara bangud nga uwa man gid it kon ano nga madaeom nga dahilan para magpakamatay rong biktima.
Nagakasubo man si Punong Barangay Rafael Briones it nasambit nga barangay bangud nga ana gid nga ka grupo rong biktima sa tanan nga hilimuon sa barangay ay tuman raya mabinuligon nga klase it tawo.
Nasayuran man nga eapsag pa eamang rayang biktima hay nawad-an eon imaw nanay ag tatay bangud nga natumbahan sanda it puno kung buli ag parehong patay ag nagbahoe rayang biktima sa pag-alaga ko anang tiyo ag tiya.
