Lakewood, Zamboanga del Sur – Gikustodiya karon sa Lakewood Municipal Police Station ang magti-ayon nga maoy responsible sa paglabay og bato ug pagkulata sa ilang silingan didto sa Purok-8, Brgy. Bag-ong Kahayag, Lakewood, Zamboanga del Sur alas 4:30 sa niaging hapon September 26, 2021.
Naila ang magtiyaon nga suspetsado nga si Narciso Tormis 36-anyos ug Ferlita Tormis, 30 -anyos, pulos residente sa nasangpit nga lugar.
Samtang nakuyapan usab ang biktima nga si Martin Pacaro, 51-anyos lumulupyo ra usab sa maong dapit.
Sa inisyal nga imbestigasyon nasayran nga pauli na unta ang magti-ayon paingon sa ilang pinuy-anan dihang kalit nga nibabag sa ilang agi-anan ang biktima nga si Martin Pacaro ug nanghulga pa gamit ang sundang.
Gumikan sa kalisang nipunit og bato ang suspek nga si Narciso og gihapak punting sa biktima nga maoy hinungdan sa pagka-igo niini ug natumba.
Dihang natumba didto na gitabangan og kulata sa magti-ayon ang nangatang nila nga silingan ug human sa panghitabo nanago kini sa ilang pinuy-anan apan gidakop kini sa sakop sa CAFGU nga anaa nadestino sa ilang lugar nga si Dodod Rodriguez.
Ang magti-ayon karon anaa na sa mga kamot sa Lakewood PNP samtang nagpadayon ang imbestigasyon sa panghitabo.
