57 anyos na natuyog sa tunga sa dayan sa Brgy. Serna, Surigao City namatay na

122

57 anyos na natuyog sa tunga sa dayan sa Brgy. Serna, Surigao City namatay na. Namatay na an 57 anyos na layaki na natuyog tunga sa dayan sa Purok 1, Brgy. Serna, Surigao City samtang tagtuohan na jaon ini sa impluwensiya sa ilimnong makahubog. An biktima an nabanggaan nan motorsiklo adton Oct. 9 sa may alas 7:00 sa gabii. Tagkilaya an biktima na si Petronilo Alegre Sajorga. Una pa ini na tagdaya sa Caraga Regional Hospital pero nakutluan sa kinabuhi sa grabe na samad sa uyo na naangkon. An nakabangga an motorsiklo an may plate number MT 5510 na tagmaneho ni John Mark Delos Reyes, 19 anyos. Sa asoy nan suspek na waya nija mabantayi na didto naghigda sa tunga sa dayan si Sajorga labi na kay hinay an ija headlight ug ngitngit isab an palibot. Kahapon an tagsang-atan na ini nan kasong Reckless Imprudence resulting in Homicide. Samtang nagpadajon an haya sa pagkakuman ni Sajorga sa isa ka punerarya sa Brgy. Luna, waya pa mopadayag an nabiling pamilya kon kon-o an tagtakda na lubong.

Facebook Comments