7 ka mga sakop sa NPA gikasuhan og Arson

39

Davao City – Gipasakaan na og kasong arson ang pito ka mga giingong sakop sa New People’s Army kinsa gitudlong nidabdab sa usa ka backhoe sa Sitio Banualay, Brgy. Palma Gil, Talaingod, Davao del Norte niadtong Abril 3, 2018.

Giila ni Police Regional Office XI Spokesperson PCI Milgrace Driz ang mga suspek nga sila Joe Almendras alyas Jose, Dalagis Balite alyas Carlos, Enting Mansumiat alyas Steb, Lugib Tausan alyas Bagani, Enting Tumbasay, Rommel Tausan ug Laro Manlologpis alyas Wacky.

Segun ni Driz ala-una sa hapon didto sa Provincial Prosecution Office, Tagum City, Davao del Norte gipasang-at ang maong kaso.

Matud ni Driz kini maoy resulta sa pagpaningkamot sa mga awtoridad diha sa pag-ila sa mga suspetsado.

Kahinumduman nga nagpatabang sa kapulisan Davao del Norte ang Project Manager sa UBI human sa gihimong pagpanunog sa mga armado.

Subay niini gipasalig usab ni Driz nga himuon sa mga kapulisan ang tanan aron mahatagan usab og hustisya ang gihimong pagpanunog sa mga heavy equipment dinhi sa syudad.

RadyoMaN Aimee Guinita

Facebook Comments