Pilang dag-on eon nga gina gamit o gina patukar sa nagakasari-sari nga okasyon sa probinsya ro Aklan Hymn nga ging compose ni Dr. Jesse Gomez nga dating DepEd Aklan School Superintendent.
Pero sa nagtaliwan nga session it Sangguniang Panlalawigan it Aklan ging paabot ni SP member Harry Sucgang sa session nga gusto nana nga parebisahon ro Aklan Hymn base man sa ana nga ging pasaka nga resolusyon.
Suno kara may lyrics sa nasambit nga kanta nga matsa uwa naga kaangay ag para kana hay medyo bukon it tama.
Na-mensyonar abi sa kanta ro katagang “May Ati nga bantog sa Kalibutan” nga para kana hay medyo saea ag dapat hay islan lang daya it “May Ati-Atihan ka nga bantog sa Kalibutan.”
Ro Ati suno kana hay bukon man gid it bantog bisan nga may mga katutubong Ati iya sa pila ka banwa sa probinsya it Aklan.
Samtang ging-klaro man ni Dr. Jesse Gomez nga gin gamit eamang nanda ro Metonymy nga may madaeom nga tinaga ag haom man suno imaw nga mag-atubang sa SP para nga ipaabot o e-ekplikar ro raya nga isyu.
