Nagpahinumdom ang Department of Social Welfare and Development kon DSWD Region 10 karong nagsingabot na ang Pasko kalabot sa Anti-Mendicancy law kon Presidential Decree No. 1563.
Sa interview sa RMN Malaybalay ngadto kang Charmaine Tadlas, ng information officer sa DSWD 10 gibutyag niini nga ilawom sa mao nga balaod bawal pagpabilin sa mga pamilya diha sa kadalanan aron manglimos.
Wala usab gidasig sa DSWD ang publiko nga muhatag sa mga manglimosay sa kadalanan tungod kay posibleng kanunay kining magbalik-balik aron mangayo.
Matud ni Tadlas nga kung dili kini tagaan, dili na usab kini mubalik sa kadalanan aron manglimos.
Kung gusto matud pa nga mutabang, mas maayo kining ipaagi ngadto sa mga institutions o kahugpungan nga adunay programa ngadto sa mga manglimusay.
Nakalatid sa balaod nga ang kanunay nga paghatag ug limos sa mga bata nakadaut, nagmugna sa ilang mga huna-huna nga dili na kinahanglan mutungha ug magtrabaho aron mukita hangtod kini hingpit nang mahimong kultura.
Nasayran nga hingtungdan silot sa mga manglimos ug mga muhatag ug limos.
