Davao City – Sigurado tambok karon ang bulsa sa mga sakop sa ‘akyat bahay gang’ human ilang nasakmit ang dekantidad nga mga alahas gikan sa apartment sa translator ug interpreter nga ilang nalungkab.
Subay niini, blangko pa ang Sasa PNP kung kinsa kining mga sakop sa ‘akyat bahay gang’ nga miatake sa apartment ni Michael Sabaldan, 40 anyos ug minyo.
Sumala ni Sabaldan nga igo na lang siya gipahibalo sa iyang katabang nga si Sorayn Aking nga gisulod sa mga kawatan ang iyang apartment sa may Belisario Heights Subdivision, Barangay Aliongto ning siyudad niadtong ikatulong semana sa Nobyembre sa miaging tuig.
Sa pagsusi sa biktima wagtang na ang assorted nga mga alahas nga mukantidad tanan og kapin 8-mil dolyares.
Wala na gisaysay sa imbestigador sa Sasa kung gi-unsa pagsulod sa mga kawatan ang pinuy-anan ni Sabaldan.
Hinoon mas gipalawman na sa kapulisan ang ilang imbestigasyon aron mailhan ug madakpan ang mga sakop sa akyat bahay gang.
RadyoMaN Joel Viray
