KALIBO, AKLAN — Bangud sa emerhensiya ag ginahingabot rong kabuhi, uwa eon magduha duha pa rong Mayor it banwang Nabas nga magmaneho it ambulansya para madaea sa hospital ro sangka igmanghod naton nga ati.
Suno kay Mayor James Solanoy nga kahapon nakabaton imaw it tawag halin sa pumueoyo it barangay Unidos, Nabas nga nagakinahangean it ambulansya bangud nga may una nga manug-unga ag kinahangean nga madaea sa hospital.
Sa ratong oras ro daywa ka driver it ambulansya hay naghatod man it pasyente ro sambilog ag ro sambilog hay naka standby sa District Meet samtang rong personal driver nana hay nagapaligos man rason nga napilitan si Mayor Solanoy nga imaw ro mag drive ag gin adtunan nana rong lugar.
Pag-abot na idto nakibot imaw nga igmanghod gali naton nga ati ro maga unga ag 19-anyos pa eamang.
Ginkarga sa ambulansya ag insigida gin daea sa Ibajay District Hospital para idto imaw mag unga.
Sa pag-eaum nana nga ok man rong sitwasyon ana gin aywan ag kon may problema mag adto eamang sa munisipyo.
Samtang imaw nag balik man para mag opisina.
