Davao City – Anaa na sumala pa sa Department of Education (DepEd) central office ang desisyon sa pagpabalik sa operasyon sa mga tulunghaan nga gi-operate sa Salugpungan Ta’tanu Igkanugon Learning Center Inc. (STTILCI) human kini gisuspinde niadtong July 12, 2019.
Sa interbyu sa DXDC RMN Davao kang Jenielito “Dodong” Atillo, spokesperson sa DepEd-XI, gisaysay niini nga anaa sa kamot ni DepEd Sec. Leonor Briones ang desisyon diin sila usab ang nagpakanaog sa maong direktiba subay sa report nga gipaabot sa departamento.
“We leave it to the wise discretion and wise appreciation of the office of the honorable secretary,” saysay ni Atillo.
Pagpasabot sa DepEd-XI spokesperson nga adunay panahon nga gihatag sa Salugpungan schools aron tubagon ang mga alegasyong gipahamtang kanila ug pamatud-an nga walay kamatuoran ang maong mga reklamo batok sa tulunghaan.
“Kining giingon nato nga ‘show cause order’ nga gihatag kanila, mao ni ang ensaktong avenue for them to really convince the department nga kadtong mga allegations imputed by Sec. Hermogenes Esperon are untrue,” saysay ni Atillo.
Kahinumduman nga 55 ka mga lumad schools ilawom sa STTILCI ang gisuspinde sa DepEd diin gilugwayan hangtud sa July 22, 2019 ang pagtubag sa nahisgutan sa maong mga alegasyon.
RadyoMaN Kirby Manzon
