President Roxas, Capiz- Dakop sa ginpatigayon nga follow-up operation sang mga kapulisan ang persona nga suspek sa pagpanghold-up sa isa ka lending collector sa Barangay Goce, President Roxas, Capiz.
Yara na nakahunong sa karsel ang 42-anyos nga suspetsado nga ginkilala kay Ramil Bogabriel y Bejo nga pomuluyo sang nasambitan nga barangay kun sa diin ini mismo ang nadakpan sang mga kapulisan samtang nagapanago sa ila poluy-an.
Suno sa panaysayon sa kapulisan sang biktima nga si Julius Galfo y Elejan sang Jordan, Guimaras, ginasubay sini ang dalan halin sa Brgy. Manoling, President Roxas kaupod ang backrider nga si Lynlyn Pastrana y Dumali sang sila ang ginbalabagan sang suspek kag ginpalukpan sang makatatlo ka beses kabangdanan sang ila pagkatumba sa ginasakyan nga motorsiklo.
Ginpalapitan ang mga ini sang suspek kag nagdeklarar sang hold-up apang nakatigayon nga makabato ang biktima kabangdanan wala makuha ang collection nga nagabalor sang P30, 000 pesos.
Narekober sang mga otoridad ang duha ka baseyo sang armasluthang kag isa ka deformed nga bala.
Natalana nga pasakaan sang kaso ang amo nga suspek.
photo © web
