General Santos City–Gilayong gimanduan sa bag-ong Regional Director sa Police Regional Office-12 nga si Police Brig. General Alfred Corpus ang upat ka mga Provincial Director ug ang City Director sa GEnsan City Police Office nga pahugtan ang ilahang kampanya batok terorismo.
Kini human ang sunod-sunod nga pagbusikad sa bomba sa Isulan Sultan Kudarat ug sa BARMM.
Sumala pa niini nga gikinahanglan pahugtan sa mga nasangpit nga mga opisyal ang ilahang pagbantay sa ilahang mga ginsakopan hilabi na sa mga pampublikong lugar nga maoy target sa mga terorista.
Dugang pa niini nga kinahanglan gyud nga magamit ug sakto sa iyahang ginsakopan ang ilahang mga resources ug pahugtan ang intel monitoring ingon man makig-alayon sa kasundaluhan ug sa kumunidad aron nga mapakgang ang susamang binuhatan.
Nasayran nga alas 9:00 ang takna sa buntag kagahapong adlawa, pormal nga milingkod si Police Brig. Corpus isip Regional Director sa Pro 12 hulip sa mireterong si Police Brig. Gen Eleseo Tam Rasco.(Dave Silagan)
