Davao City – Padayon pa sa pagsuta ang kabomberohan sa kantidad sa damyos human naugdaw ang tibuok panimalay sa pamilya Rubio alas-6:43 ganihang buntag sa may Blk. 84, Lot 3 Capili Subd., Rosalina Village III ning syudad sa Davao.
Sa interbyu kang FO2 Jerry Gayo, imbestigador sa Talomo Fire Station, nagsugod ang sunog sa kwarto sa anak ni Francisco Rubio, tag-iya sa maong balay, diin electrical ang probable cause niini.
Sumala sa anak sa biktima nga naka saksak sugod pa kagabii ang tanang appliances ug gadget niini sama sa electric fan, power bank, ingon man cellphone diin pagka buntag gibilin niya kini aron manglaba.
Nakamatikod kini nga nanimaho og sunog ang panimalay nila gani sa iyang pagsuta nasayran na lamang niini nga dako na ang kalayo sa kwarto ug mao na ang paglamoy sa tibuok panimalay.
Gideklarang fire out ang maong insidente alas-7:25 sa buntag diin partially na damage usab ang side car sa pamilya Rubio.
Subling pahimangno sa kabomberohan nga kanunay bantayan ang mga nakasaksak nga electrical gadgets ug ibton kini kung adunay laing buhaton.
RadyoMaN Jason Amisola
