Malay, Aklan – Arestado ro sangka service crew sa isla it Boracay matapos nga madiskubrehan nga peke ro anang ginagamit nga health card.
Nakilaea rong gin aresto kay Jinky Sumagingsing, 30-anyos, residente it Brgy. Maloco, Ibajay ag nagatrabaho bilang service crew sa sangka fast food chain sa isla.
Base sa report it Malay PNP, nga ko Lunes it hapon hay nag adto si Sumagingsing sa opisina it Municipal Health Office nga nahamtang sa Brgy. Balabag para kunta mag renew it anang health card pero nadiskubrehan raya it Sanitary Inspector nga bukon it original rong perma it Municipal Health Officer nga si Dra. Maria Nei Mucho bangud nga raya hay blurred ag gin scan eamang.
Samtang sa pag-usisa pa gid hay nasayuran man nga uwa it rekord si Sumagingsing sa MHO nga nakabuoe imaw it health card kundi ginbuligan eamang imaw it sangka kilaea nana para mag peke it health card.
Sa makaron hay kulong si Sumagingsing sa lock up cell it Malay PNP ag magapangatubang it kasong Falsification of Public Documents in relation to 172 Revised Penal Code.
