TACLOBAN CITY – Narikupo han mga otoridad ha Cebu City an 15 nga armas ha sulod han bag-o nga palit nga bus han Local Government han Marabut, Samar.
Basi han report tikang ha Cebu City Police Office, nakakarawat hira hin impormasyon tikang ha Waterfront Police Station bahin han presensya han mga armas ha sulod han bus nga gin-inspeksyon dayon an mga ini dida han huwebes han gab-i.
An bus in tisulod na unta ha Roro Vessel tipakadto ha Ormoc City, Leyte.
Syahan nga nakit-an han mga otoridad an usa nga caliber .45 nga pusil nga nakabutang ha bawbaw han usa nga speaker. Gin-inspeksyon gihapon han mga kapulisan an compartment han speaker ngan didto nakit-an an 10 nga caliber .38 nga pusil ngan pira nga caliber .45 nga pusil.
Nakuha pa an 5 nga extra magazine.
Dakop naman han mga kapulisan ha Cebu an mga gintutuuhan suspek nga hira Joel Pedrosa, 45 anyos ngan residente ha Brgy. Tinabanan Marabut, Samar ngan hi Herman Gagmatan, 31 anyos ngan residente ha Brgy. Binukyahan, Marabut, Samar.
Ha pagka-yana, padayon nga nakikipagsumpayan an RMN Tacloban ha RMN Cebu para makuha pa an iba nga impormasyon.
Abri naman an RMN Tacloban ha magigin pahayag han Local Government han Marabut, Samar.
