Davao City – Nakita ni Davao Del Sur Governor Douglas Cagas nga walay maayong ihatod diha sa kahimtang sa kinabuhi sa mga residente inay maguba lang ang panginabuhian ug aktibidad sa katawhan ubos sa hard lockdown nga gipatuman karon sa Cebu hatud sa padayon nga pagsaka sa COVID-19 sa maong lugar.
Matud ni Cagas, dili na angayang padugayon pa ang pagpatuman sa hard lockdown kon dili, mas sayohon ang pagbakwi niini aron dili mabutang sa alaot ang normalidad ug paglihok sa katawhan sa inadlaw-adlaw nilang buluhaton.
Giangkon sa gobernador nga ang hard lockdown maoy hinanaling aksyon ug gikinahanglang tubag alang sa pagpukan sa COVID-19 apan kon magdugay og maayo ang implimentasyon niini, mamahimong mas makaluluoy unya mao ang katawhan mismo.
Segun sa gobernador nga ang pinaka-uyokan sa mensahe niining hard lockdown mao ang pagdisiplina sa katawhan diha sa pagpaminaw sa mga palisiya nga naglakip sa mga guidelines sa kapadayong gipatuman sa gobyerno.
Pikas bahin, gipalanog ni Cagas ang iyang pag-uyon sa pag-oktaba sa mga social gatherings sama sa simba tungod sa kabalaka nga basin musutoy pa’g maayo ang kaso sa pandemic sama sa nagapanghitabo karon sa Visayas Region.
RadyoMaN Joel Viray
