Ya esta pacifico el celebraccion del Fiesta Pilar ayer amediante el mal tiempo que ta experiencia el ciudad.
Na entrevista del RMN Zamboanga, el portavos del Zamboanga City Police Office Inspector Edwin Duco ya abla cay base na diila conducta del post security assessment briefing ya conduci anoche, nuay algo incidente el ya ocuri durante el dia del fiesta ayer, prinsipiando na prosisyon hasta na misa, fuera lang con el dos soceso de atenccion medical porcausa na monton del mga hente.
Si Duco ya abla cay grande ayuda na mantensyon del seguridad el cooperasyon y suporta del publico na modo de seguridad ta implementa el policia y militar durante el occaccion.
Ya escplica tambien si Duco cay ya decidi el policia trangca unratito con el main gate na entrada del fortaleza durante el llegada del prosisyon para evita el posible stampede, cay bien lleno ya el adentro del fortaleza.
Temporario lang asegun el mga pulis ya serra con el gate y cuando ya aploja ya umpoco el hente, ya abri ya sila otravez coneste na publico.
Si Duco ya abla cay todol mga observaccion del publico que ya lleva na atenccion del RMN Zamboanga hay lista sila para queda este basejan diila llegar el siguiente mga celebraccion del Fiesta Pilar na mga años que viene. – *Bhong Simbajon/RMN News*
