Natingala si Councilor Wilson “Jun” Gamboa Jr. kun ngaa indi luyag sang iya mga kaupdanan sa city council nga mahibaluan kun diin nagkadto ang pondo nga ginhatag sa ciudad para sa COVID-19 response sini.
Ini ang reaksyon ni Councilor Gamboa matapos nga ginbasura sang konseho ang resolusyon sini nga nagahingyo sang liquidation sa P119 million nga Bayanihan grant gikan sa national government para gastuhon sa mga tikang sini batok sa coronavirus.
Sa interview sang DYHB, ginpahayag ni Gamboa nga importante nga mahibaluan kun diin nagakadto ang mga pondo sang gobyerno. Ginhatagan man sini pagtamod nga importante ang liquidation bangud diri mahibaluan kun may savings pa bala sa P119 million, kag agud nga makakuha naman sang dugang nga pondo gikan sa Bayanihan 2 nga ginpirmahan na ni Presidente Rodrigo Duterte.
[image: image.png]
