General Santos City—Crime of Passion ang gitan-aw nga motibo sa pagpatay sa dalaga nga si Analuna Silvestre Daz, hingkod ang panuigon, Pharmacist, residenti sa Offring Village, barangay Calumpang, Gensan kansa una nang gipusil sa wala pa mailhing suspek didto mismo sa maong lugar.
Sumala ni Spo4 Fredirico Franco, imbistigador sa Police Station 7 nga paingon unta sa iyang trabaho sa usa ka Pharmacy sa Barangay Calumpang ang nasangpit nga biktima dihang siya giharangan sa suspetsadong nakamotorsiklo.
Subay sa pahayag sa mga testigo naglalis pa ang biktima ug ang suspek pila ka minutos ang nakalabay didto na nahitabo ang pagpamusil.
Dugang pagbutyag ni Spo4 Franco nga gisuwayan pa ug dala sa suspek ang biktima sakay sa motorsiklo apan tungod bug-at ang nasangpit iya nalang kining gibilin sa lugar apan iyang gibitbit matud pa ang cellphone sa biktima.
Sa karon wala pay pangalan ang kapulisan sa suspek sa krimen apan nagpahigayon na ug lawom nga imbistigasyon ang kapulisan aron nga mailhan ang suspetsadong mipusil sa biktima.
