General Santos City—Samad sa bukton, kamot ug sa paa ang naangkon sa usa ka dalaga nga itago lang sa pangalang alias Witney (gituyo ug tago ang pangalan) human gidunggab ug gisuwayang luguson sa wala pa mailhing suspetsado sulod mismo sa iyang boarding house nga nahimutang sa casa Luisa, Barangay Lagao, Gensan alas 2:25 ang takna sa kabuntagon.
Sa pakighinabi sa RMN Gensan ngadto sa biktimang si Alias Wetney iyang gibutyag hilabihan ka hinanok ang iyang tulog niadtong higayona, apan nakamata nalang kini dihang may nitabon ug panapton sa iyang mata ingon man sa iyang ilong.
Tungod sa kakurat, nisyagit ang biktima apan siya gidunggab sa suspek igo sa iyang bukton ingon man sa iyang kamot ug paa. Didto na misibat ang suspek agi sa bintana kansa gituohang mao usab ang giagian sa suspek dihang misulod kini sa lawak sa biktima.
Dugang pa ni Alias Witney nga nawala ang iyang cellphone ug uban niyang mga gamit ang nakit-an gawas na sa iyang boarding house.
Sa karon ang biktima nagpaalim sa iyang mga samad sa Dr. Jorge Royeca Hospital, samtang nagpadayon pa ang gihimong imbistigasyon sa awtoridad kalabutan sa maong insidenti.
