Davao City – Nakig koordinar na uban sa nagkadaiyang security agencies sa mga condo units sa syudad sa Davao ang Philippine Drug Enforcement Agency (PDEA-XI) aron batukan ang kampanya sa iligal nga droga.
Kini subay sa mga sunod-sunod nga operasyon sa PDEA didto sa kaulohan nga sagad mahitabo sa mga condominium units.
Gipasabot ni PDEA XI Assistant Regional Director Atty. Ben Joseph Tesiorna nga dako ang tabang niini alang kanila sanglit kini ang makabantay sa mga nagasulod ug gawas sa mga establisemento samtang nagahatag og seguridad sama sa condominium.
Saysay ni Tesiorna nga sagad nalambigit niini mao ang mga estudyante ug young professionals sanglit sila ang gikunsiderang ‘party goers’ diin pipila sa mga ginagamit mao ang marijuana, ecstacy, ug shabu.
“We’re still in the process of investigating sa mga involve nga personalities.. mga batan-on ni, mga estudyante kay sila ra man gud maka afford og condo mga anak sa datu but rest assured pag hinog na ang investigation we will conduct an operation,” matud niini.
Gawas sa mga condo ginamonitor usab sa PDEA ang managlahing parke ingon man ang mga lugar nga sagad ginapahigayonan og parties.
Sa ulahing operasyon sa PDEA-XI, nakasakmit sila og tunga sa kilo sa marijuana sa usa ka operasyon nga gilusad sa usa ka condo sa dalang Magallanes ning syudad sa Davao.
RadyoMaN Jason Amisola
