Malay, Aklan – Posible nga makasuhan it Grave Scandal rong daywa ka mga foreign national nga nagpatigayon it pakig hilawas kaina it aga-aga sa front beach kung Station 1, Boracay.
Suno kay PO3 John Christian Nalangan it Boracay Tourist Assistance Center (BTAC) nga sa andang pagpatigayon it imbestigasyon hay nakilaea rong nag post it picture kay Jhonyvic Villanueva Sr., alyas “Orig”, 38-anyos, tattoo artist, residente it Purok 2, C. Laserna St., Kalibo, Aklan ag temporaryo nga naga istar sa Sitio Ambolong ManocManoc sa nasambit nga isla.
Sa panaysayon ni Villanuea nga kaina mga alas 2:00 it aga-aga samtang sanda naga tikang-tikang ko anang amigo sa front beach it Station 1 may napan-uhan sanda nga ginatumpukan it tawo.
Nag adto man sanda ag naki usyuso ag rato ngani ro andang nakita ag nag take imaw it picture ag gin upload.
Pagkatapos kara hay may mga nagsaway man nga ko ulihi hay nag untat ag nagpanaw.
Ro nasambit nga mga foreigner hay mga European in origin, mga 20s to 30s rong pang edaron.
Sa makaron hay nagapatigayon pa it dugang nga imbestigasyon rong kapulisan para nga makilaea, masayran kon siin nagadayon ag mapanabat sa laye ro nasambit nga mga foreigner.
