Kalibo, Aklan — Daywa ka mga kaso it pagpamuno rong nagtuhaw sa magkaseparar nga lugar kahapon ag kaina it aga-aga.
Una nga kaso natabo sa Brgy. Balabag, Boracay.
Ro biktima nakilaea kay Joemar Tembrevilla, 21-anyos ag residente it Pook Talipapa, Kalibo nga nakaangkon it tama sa waea nga dughan, samtang rong suspek nakilaea man kay Claudio Cabatac Jr., 35-anyos ag residente it Kinalangay Nuevo, Malinao ag temporary nga naga istar sa isla.
Suno sa biktima nga nag-inuman sanda ko suspek kaibahan pa gid ro sambilog nandang kaibahan nga si Jayson Aguban.
Samtang naga inum-inum may nagpatunga nga uwa pagka intindihan sa biktima ag suspek, nga ko ulihi hay umuli lang ro suspek pero makataliwan ro pilang minuto hay bumalik may daeang basag nga bote ag binuno ro biktima.
Una nga gindaea ro biktima sa sangka hospital sa Boracay ag makaron hay presente nga naka admit sa Aklan Provincial Hospital samtang rong suspek kulong sa lock up cell it Boracay PNP.
Sa pihak nga parte, ro ikaywang insidente hay natabo sa Brgy. Carugdog, Lezo, Aklan kaina it aga-aga.
Ro biktima nakilaea kay Alex Suguillon, 30-anyos, nga nakaangkon it tama sa ibabaw it dughan, tiyan ag butkon santang rong suspek nakilaea kay Allan Istanislao, 27-anyos tanan residente it nasambit nga barangay.
Suno kay SPO4 Sardon it Lezo PNP nga natabo rong insidente kaina it mga 12:00 rong aga-aga samtang naga inum-inum rong daywa ag may una nga nagpatunga nga uwa pagka intindihanan sa daywa.
Ko ulihin nag desisyon eon lang si Suguillon nga mag-uli pero samtang imaw nagapasakay sa anang motorsiklo hay gin- apas imaw is suspek ag dayon nga gin binuno.
Sa makaron hay padayon nga ginabueong ro biktima sa ICU it Aklan Provincial Hospital samtang rong suspek hay nagapabilin nga at-large.
