Kalibo, Aklan – Natigayon nga maaresto it mga kapulisan rong sangka eaeaki matapos nga takawan rong dayaw ka mga kolektor kaina it aga-aga sa Brgy. Old, Buswang, Kalibo, Aklan.
Ro mga biktima nakilaea kanday Gleen Daniel, 22-anyos, residente ng Lopez Jaina, Misamis Occidental ag Ariel Bautista, 20-anyos it Damayan, Sapian, Capiz ag parehong naga board sa nasambit nga barangay.
Samtang rong suspek nakilaea kay Joenel Rodrigo Parcon, 22-anyos, native it Cansilayan, Murcia, Negros Occidental ag presente man nga naga dayon sa anang tiya sa Brgy. Andagao.
Suno kay Police Corporal Erick John De Lemos it Theft and Robbery section it Kalibo PNP nga nagreklamo sa Kalibo PNP rong mga biktima nga sanda ra hay tinakawan it suspek nga anda man nakainuman kabii sa andang boarding house kon sa siin pagbugtaw nanda kaina hay uwa eon ro suspek ag ro andang sling bag nga may sueod nga kwarta nga naga abot it P 39,500.00, cellphone ag iba pang dokumento.
Sa pag-imbestiga it mga kapulisan bali nabuoe kay Daniel ro P 24, 500 ag Vivo cellphone samtang kay Bautista hay P 15,000.00 ag mga dukomento.
Kumo kilaea man it mga biktima rong suspek ag may picture hay insigida raya nga gin forward sa Malay PNP agod nga check ag sa ginhimo nga hot pusuit operation naabutan rong suspek nga sakay it sangka barko paadto it Manila.
Narecover sa suspek rong kwarta nga nagabalor eon lang it P 33,000.00 ag ticket it 2Go.
Sa makaron hay iya eon sa Kalibo PNP rong suspek ag magapangatubang it kasong pagpanakaw bangud nga desedido man rong mga biktima nga magpasaka it kaso.
