Davao City – Gibutyag karon sa Davao City Police Office (DCPO) nga walay nalambigit nga kapulisan sa dakbayan sa Davao sa mga investment schemes nga naglutaw karong panahona.
Sa pakighinabi sa DXDC RMN Davao kang DCPO director Police Senior Superintendent Alexander Tagum, gikumpirma niini nga ni-angkon man ang pipila sa iyang mga personahe nga nalambigit ang ilang asawa o ilahang kabanay, apan sila mismo ang wala mi-apil sa maong money-making scheme.
“Based sa akoa mismong personal nga interview and assessment sa akong mga personnel, wala may mga nanggawas nga mga pangalan. Although naay mga admission sa uban nga mga paryente, mga asawa nila involved, but mismong personnel sa DCPO wala gyud,” saysay ni Tagum
Gipasabot ni Tagum nga ugaling adunay malambigit nga pulis, mag-atubang kini og kasong administratibo apan dili kini madis-aramahan gawas lang kung usa ka klase sa criminal offense ang iyang atubangon.
Kahinumduman nga gironda sa National Bureau of Investigation (NBI) ang usa ka investment schemes sa Tagum city diin adunay nakitang lane nga gitagana alang sa mga kapulisan ingon man sa kasundalohan.
RadyoMaN Kirby Manzon
