DELIVERY VAN SANG SIGARILYO, GINHOLD-UP SA BANWA SANG SAN ENRIQUE, ILOILO.

Ginhold-up sang duha ka mga suspek nga nagasakay sa motorsiklo ang delivery van sang sigarilyo nga naga-pundo sa Sitio Kawa, Barangay Abaka, san Enrique, Iloilo mga alas 11:50 kaina sang udto.
Ginpahayag ni Police Lt. Alexander Lauron, hepe sang San Enrique PNP nga papuli na siyudad sang Passi ang delivery van sang GPI Company matapos magdeliver sang sigarilyo sa ila mga kliyente sa barangay Dacal, San Enrique apang nagpasilong ini sa kakahuyan agud magpahuway-huway ang driver kag ang salesman.
Samtang nagapahuway, ginpalapitan ang mga ini sang duha ka suspek nga nakamotorsiklo kag ginpalukjpan kag nagdeklarar sang hold-up.
nakuha sa mga biktima ang 8 mil pesos nga collection money, 1,000 pesos nga personal money sang driver kag cellphone sini nga G7 Samsung nga nagabalor sang 10,000 pesos.
Ang driver sang delivery van amo si Wilgen Cuello, 34 anyos sang barangay Tuy-an, Cabatuan kag ang salesman amo si Andrew Paraon, 28 anyos sang barangay San Antonio, Oton, Iloilo.
Matapos ang insidente gilayon nga nagpangayo sang bulig sa mga pumuluyo sa lugar ang mga biktima kag nagreport sa mga pulis.
Gilayon man nga nagresponder ang kapulisan agud lagson ang mga suspek apang wala na makit-an.

Facebook Comments