Arestado ang duha ka high value target sang PDEA sa buy bust operation sa barangay Talusan, Dumangas, Iloilo alas 5:45 kaina sang hapon.
Ginkilala ang mga subject nga sanday Hulsey Alivio, 36 anyos sang barangay Tabucan, Dumangas kag si Symel Docdocil, 29 anyos sang Barangay Aurora Del Pilar, Dumangas, Iloilo nga lunsay High Value Target sang PDEA 6.
Ginhiwat sang gintingub nga puwersa sang Provincial Drug Enforcement Unit kag Dumangas PNP ang buy bust operation kon sa diin narecover sa duha ang isa ka daku nga plastic sachet sang ginapatihan shabu nga ginabanta nagabalor sang 30,000 pesos , isa ka gamay nga plastic sachet nga may unod nga ginapatihan shabu, isa ka bundle sang 30,000 pesos nga boodle money.
Ginabanta nga naglab-ot tanan sa 70,000 pesos ang kabug-usan nga balor sang illegal nga druga nga narecover sa mga suspek.
Sa karon,priso na sanday Alivio kag Docdocil sa Dumangas Police Station kag pagapasakaan sang kaso nga paglapas sa R.A. 9165.
