Gi-welcome sa Department of Justice o DOJ ang desisyon ni Judge Jose Escobido sa Regional Trial court Branch 37 nga nagpahamtang sa silot nga pagka bilanggo sa tibuok kinabuhi ni kanhi Pagatpat Barangay Kapitan Achilles Babaran.
Matud ni Regional State Prosecutor Merlyn Uy nga lig-on ang kasong rape batok ni Babaran human ang maong akusadong kanhi kapitan, nagbayad sa 250-thousand pesos ngadto sa inahan sa batang biktima aron i-atras ang iyang kasong giatubang sa husgado.
Gibutyag ni Uy nga gihatagag gibug-aton ni Judge Escobido ang testimonya sa inahan sa biktima kay iya nang nasulti sa korte ang tanang hitabo batok sa iyang anak ayha pa nagbayad sa 250-mil pesos si Kapitan Babaran.
Apan matud ni Uy nga ang desisyon ni Judge Escobido, dili pa final kay ang akusado, gihatagan pag 15 ka adlaw sugod kagahapon nga mo-apilar sa iyang kaso.
Samtang pending appeal ang kasong rape batok ni Babaran ang maong konbiktadong kanhi kapitan, gipriso sa Lumbia City Jail.
