BACOLOD CITY – Padayon karon nga detained sa estasyon sang police ang nadakpan nga suspek nga ginatudlo doktor sang napatay nga high value drug target nga si Ramy Poja sa ginpatigayon nga buy bust operation kahapon sang hapon sa Brgy. Taculing, Bacolod City.
Ang suspek nga si Dr. Solomon Tan, 46 anyos ang edad, residente sang Brgy. Taculing, Bacolod City ang nadakpan sa ginpatigayon nga buybust operation sang PDEA may mg alas 4:30 kahapon sang hapon sa Circumferential Road, Brgy. Taculing.
Wala labot kay Tan, dakup man ang driver sini nga si Ramonito Lee, 37 anyos ang edad, pumuluyo sang Puentebella Subd., Brgy. Taculing.
Ginpahayag ni PDEA 6 Negros Occidental Provincial Officer Grace Cruz, si Tan ang ginakabig nga high value target sa ciudad sang Bacolod.
Nakuha sa possession sang suspek ang kapin 60 ka gramos sang suspected shabu kag may market value nga kapin P408 mil pesos.
Lakip sa nakuha sa mga suspek ang digital nga kilohan, drug paraphernalia kag isa ka van.
Madumduman nga si Tan ang ginatudlo doktor nga nagbulong sa drug personality nga si Ramy Poja sang ini ang napilasan sa drug operation nga ginpatigayon sa Sitio Sibucao, Brgy. Banago antes ini nga napatay./dyHB BACOLOD
