Gikustodiya karon ang driver sa prime mover truck nga si Richard Galula, 28 anyos, minyo, nga taga-Bantiles, Bugo ning dakbayan human kini boluntaryong misurender sa Tagoloan Municipal Police Station.
Kini human nabanggaan ni Galula ang usa ka pick-up nga gimaneho ni Pelayo Ocang Lunon, 49 anyos, minyo nga taga-Villa Rosario, Casinglot, Tagoloan, Misamis Oriental.
Gibutyag ni PO2 Louel Miniano, ang traffic investigator sa Tagoloan PNP nga gikan ang trailer truck sa pantalan sa Tagoloan ug paingon na unta sa Cagayan de Oro dihang kalit mi-left turn ang pick up nga gikan sa Cagayan ug paingon sa Tagoloan hinungdan nabanggaan kini.
Tungod niini, nadaro sa trailer ang pick-up ug didto kini mipaingon sa balay ni Tagoloan Municipal Councilor Sai-sai Emano nga miresulta sa pagkalumpag sa atop sa ilang garahe ug pagkadaot sa ilang sakyanan.
Matud sa nakasaksi sa driver sa pick-up nga gikumot niini ang iyang tiyan ug dughan busa nagtuo si PO2 Miniano nga posibling giatake kini sa iyang sakit tungod na usab sa ilang nakuhang tambal nga maintenance sa highblood sa bulsa niini.
Nasayran nga unang gidala sa St. Paul Hospital sa Tagoloan ang biktima kinsa anaa sa kritikal nga kahimtang.
